136. สุวณฺณหํสชาตกํ
[136]
ยํ ลทฺธํ เตน ตุฏฺฐพฺพํ, อติโลโภ หิ ปาปโก;
หํสราชํ คเหตฺวาน, สุวณฺณา ปริหายถาติฯ
สุวณฺณหํสชาตกํ ฉฏฺฐํฯ
137. พพฺพุชาตกํ
[137]
ยตฺเถโก ลภเต พพฺพุ, ทุติโย ตตฺถ ชายติ;
ตติโย จ จตุตฺโถ จ, อิทํ เต พพฺพุกา พิลนฺติฯ
พพฺพุชาตกํ สตฺตมํฯ
138. โคธชาตกํ
[138]
กิํ เต ชฏาหิ ทุมฺเมธ, กิํ เต อชินสาฏิยา;
อพฺภนฺตรํ เต คหนํ, พาหิรํ ปริมชฺชสีติฯ
โคธชาตกํ อฏฺฐมํฯ
139. อุภโตภฏฺฐชาตกํ
[139]
อกฺขี ภินฺนา ปโฏ นฏฺโฐ, สขิเคเห จ ภณฺฑนํ;
อุภโต ปทุฏฺฐา กมฺมนฺตา [ปทุฏฺฐกมฺมนฺโต (สี.), ปทุฏฺโฐ กมฺมนฺโต (ปี.)], อุทกมฺหิ ถลมฺหิ จาติฯ
อุภโตภฏฺฐชาตกํ นวมํฯ
140. กากชาตกํ
[140]
นิจฺจํ อุพฺพิคฺคหทยา, สพฺพโลกวิเหสกา;
ตสฺมา เนสํ วสา นตฺถิ, กากานมฺหาก [กากานสฺมาก (สี. สฺยา. ปี.)] ญาตินนฺติฯ
กากชาตกํ ทสมํฯ
อสมฺปทานวคฺโค จุทฺทสโมฯ
ตสฺสุทฺทานํ –
อิตรีตร รกฺขสิ เขมิโย จ, ปโรสตปญฺเหน อาภสฺสโร ปุน;
อถ หํสวรุตฺตมพพฺพุชฏํ, ปฏนฏฺฐก กากวเรน ทสาติฯ
15. กกณฺฏกวคฺโค
141. โคธชาตกํ
[141]
น ปาปชนสํเสวี, อจฺจนฺตสุขเมธติ;
โคธากุลํ [โคธกฺกุลํ (ก.)] กกณฺฏาว [กกณฺฏกา (ก.)], กลิํ ปาเปติ อตฺตนนฺติฯ
โคธชาตกํ ปฐมํฯ
142. สิงฺคาลชาตกํ
[142]
เอตญฺหิ เต ทุราชานํ, ยํ เสสิ มตสายิกํ;
ยสฺส เต กฑฺฒมานสฺส, หตฺถา ทณฺโฑ น มุจฺจตีติฯ
สิงฺคาลชาตกํ ทุติยํฯ
143. วิโรจชาตกํ
[143]
ลสี จ เต นิปฺผลิตา, มตฺถโก จ ปทาลิโต [วิทาลิโต (สี. ปี.)];
สพฺพา เต ผาสุกา ภคฺคา, อชฺช โข ตฺวํ วิโรจสีติฯ
วิโรจชาตกํ ตติยํฯ
144. นงฺคุฏฺฐชาตกํ
[144]
พหุมฺเปตํ อสพฺภิ [พหุเปตมสพฺภิ (ก.)] ชาตเวท, ยํ ตํ วาลธินาภิปูชยาม;
มํสารหสฺส นตฺถชฺช มํสํ, นงฺคุฏฺฐมฺปิ ภวํ ปฏิคฺคหาตูติฯ
นงฺคุฏฺฐชาตกํ จตุตฺถํฯ